FONON’da brilliantlar olami: ongli tanlov sari navbatdagi qadam

FONON’ning navbatdagi uchrashuvi tabiatning eng noyob va hayratlanarli ne’matlaridan biri — brilliantga bag‘ishlandi.

Mehmonlari uchun muntazam master-klasslar tashkil etib kelayotgan O‘zbekistonning birinchi zargarlik uyi — FONON InterContinental Tashkent mehmonxonasida brilliantlar olami va ularni baholash xususiyatlariga bag‘ishlangan navbatdagi tadbirni o‘tkazdi.

Master-klass davomida ishtirokchilar brilliantlarning kelib chiqishi, shakllanish jarayoni hamda tabiiy va sun’iy yetishtirilgan toshlar o‘rtasidagi asosiy farqlar haqida ma’lumot oldilar. Shuningdek, mehmonlar qimmatbaho toshlarni baholashning xalqaro standartlari va ularning qiymatini belgilovchi mezonlar bilan tanishdilar.

Tadbirning amaliy qismida FONON mutaxassislari brilliantlarni professional tekshirish usullarini namoyish etdilar hamda zargarlik buyumlarini tanlashda e’tibor qaratilishi lozim bo‘lgan muhim jihatlar haqida so‘zlab berdilar.

Master-klass ochiq muloqot formatida o‘tdi va har bir mehmon o‘zini qiziqtirgan savollarga ekspertlardan batafsil javob olish imkoniyatiga ega bo‘ldi.

Bunday uchrashuvlar qimmatbaho toshlar haqidagi bilimlarni ommalashtirish, shuningdek, zargarlik buyumlarini ongli ravishda tanlash madaniyatini rivojlantirishga qaratilgan FONON falsafasining muhim qismiga aylangan.